Atli Týr Ægisson

Flugeldar. Ártalið 2025 sést á miðri mynd

Engar hugleiðingar um ástandið í heiminum eða þjóðfélaginu um þessi áramót. Ég lofaði líka einhverntíma að þessi vefur yrði ekki vettvangur pólitískrar dægurmálaumræðu. Það er nóg af svoleiðis annars staðar á internetinu. Það fer líka betur með geðheilsuna að fylgjast ekki með fréttum. Vindum okkur bara beint í það hvernig þetta ár hefur verið hjá mér.

Fyrir mig hefur þetta verið ágætis ár. Ég hef komist stóráfallalaust í gegnum það. Heilsan hefur verið í lagi, sem maður getur þakkað fyrir, kominn á þennan aldur. Hjólatúrar og fjallgöngur. Og sund eftir því sem Vesturbæjarlaugin var opin. Fullt af ferðalögum. Mikið spil. Smá söngur. Smá kaffi. Mikill bjór. En svoleiðis myndir þola ekki alltaf dagsljósið. Samverustundir með vinum, kunningjum og ættingjum, bæði hérlendis og erlendis.

Ég segi ekki alltaf frá öllu á samfélagsmiðlum sem ég geri. Facebook er líka orðin svo leiðinleg. Það er miklu betra að taka bara það helsta saman frá árinu og segja frá því öllu í einu. Og þá á stað sem Hr. Sykurbergur hefur ekki ritstjórnarvald yfir.

Hér eru helstu hápunktar ársins.

Árið 2025 byrjaði á sama stað og 2024 endaði: í Birkibergi í Hafnarfirði.

Flugeldar og svifryksmengun um áramót í Setbergshverfinu í Hafnarfirði. — Flugeldar yfir Setbergshverfinu í Hafnarfirði. Svifryksmengun langt yfir heilsuverndarmörkum!

Hélt áfram að vinna þarna:

Aðalbygging Háskóla Íslands, upplýst í myrkri — Aðalbygging Háskóla Íslands í janúarmyrkrinu.

Þrjóskaðist við að hjóla í vinnuna, næstum því á hverjum degi. Slapp lifandi, ómeiddur og án slysa frá bílafrekjunni þetta ár.

Hjól á göngustíg í Skerjafirði, nálægt Reykjavíkurflugvelli. — Hjólið á góðviðrisdegi í janúar.

En allar þessar lokanir og helvítis hjáleiðir að gera hjólandi og gangandi lífið leitt! Þetta ár hefur sýnt að skipulagsyfirvöld og verktakar, hvar sem þau eru á höfuðborgarsvæðinu, kunna ekki að útbúa almennilegar, notendavænar hjáleiðir.

Tímabundið umferðarskilti merkt Hjáleið. — Ein af fjölmörgum hjáleiðum á þessu ári!

Mætti á árlega ættarþorrablót Syðra-Lónsættar í febrúar.

Fólk að dansa á þorrablóti. — Stuð og stemmning á þorrablóti Syðra-Lónsættar, á Ásvöllum í Hafnarfirði.

Mætti á UT-messuna í Hörpu.

UT-messan í Hörpu. — Fólk á UT-messunni í Hörpu.

Spilaði á þorrablóti Hafnarfjarðar. Og læt ekki góð tækifæri til myndatöku í myndakössum frá mér sleppa.

Atli með trompet á þorrablóti Hafnarfjarðar. — Með trompetinn á þorrablóti Hafnarfjarðar.

Mætti á árshátíð Háskóla Íslands. Það var gaman.

Love-Gúrú að performera uppi á sviði. — Love Gúrú tryllir lýðinn á árshátíð Háskóla Íslands.

Mætti og tók þátt í háskóladeginum, samkvæmt venju.

Gestir á háskóladeginum á Háskólatorgi, Háskóla Íslands — Gestir og framtíðarnemendur við Háskóla Íslands.

Söng Carmina Burana með þessu fólki.

Kór á æfingu í Íþróttahúsinu við Strandgötu, Hafnarfirði. — Kammerkór Hafnarfjarðar, ungmennakórinn Bergmál, Kór Öldutúnsskóla, Barnakór Hafnarfjarðarkirkju og gestir (og Soraya og Eggert slagverksleikarar) á æfingu fyrir Carminu Burönu í íþróttahúsinu Strandgötu.

En ákvað á haustdögum að taka mér pásu frá kórstörfum. Það reyndist svo afdrifarík pása að kórinn var, að því er virðist, lagður niður og sameinaður öðrum. Talandi um að vera ómissandi!

Kórinn Cantus, áður þekktur sem Kammerkór Hafnarfjarðar og kór Hafnarfjarðarkirkju, á tónleikum 21. desember.

Spilaði á tónleikum í Hörpu með þessu fólki.

Lúðrasveit Hafnarfjarðar á æfingu fyrir tónleika í Norðurljósum, Hörpu. — Lúðrasveit Hafnarfjarðar á æfingu fyrir 75 ára afmælistónleika í Norðurljósum, Hörpu.

Fór í nokkra göngutúra upp á Helgafell. Mun þó ekki hafa komið þangað upp nema 17 sinnum þetta árið. Hér er strax komið tækifæri til bætinga á næsta ári.

Skilti sem bendir á Helgafell. Helgafell í Hafnarfirði í bakgrunni. — Upphafsstaðurinn við Helgafell í Hafnarfirði.

Fór í vorferð til Münchenar með þessum:

Á góðri stund í Augustiner-bjórgarðinum í München. — Á góðri stund í Gústa: Brynjar, Þórhallur Ingi, Finnbogi, Eiríkur Rafn og undirritaður í Augustiner-bjórgarðinum í München.

En þessi ferð var ekki bara bjórdrykkja, heldur líka endurmenntun. Fór að hlusta á hvernig heimamenn spila bæverska polkamúsík.

Wolfgang Grünbauer stjórnar lúðrasveitinni Die Oktoberfest Musikanten. — Wolfgang Grünbauer (á miðri mynd) stjórnar lúðrasveitinni Die Oktoberfest-Musikanten.

Kom á Bessastaði í fyrsta sinn á ævinni.

Bessastaðir — Starfsmenn Háskóla Íslands í vorferð á Bessastöðum.

Fór til Prag.

Spilaði með þessu fólki í Prag. Fengum m.a.s. gullverðlaun fyrir frammistöðu okkar!

Lúðrasveit Hafnarfjarðar í lúðrasveitakeppni i Prag. — Lúðrasveit Hafnarfjarðar í lúðrasveitakeppni í Prag.

Fór í bað í Kraumu

Fór til Barcelona, til að fá eitthvað sumar og sól á þessu ári.

Útsýni yfir Barcelona. Sagrada familía fyrir miðri mynd. — Barcelona.

Gerði líka stutt stopp í Frakklandi og Andorra.

Mynd frá Andorra la vella, höfuðborg Andorra. — Andorra la vella, höfuðborg Andorra

Fór til Montserrat.

Kirkja og fjöll í Montserrat. — Fjallstopparnir í Montserrat.

Skoðaði Casa Batllo, sem var bara á næsta götuhorni við hótelið mitt í Barcelona.

Horft út um glugga á Casa Batllo í Barcelona. — Casa Batlló, hannað af arkitektinum Antoni Gaudí.

Heilsaði upp á gíraffa.

Tveir gíraffar í dýragarðinum í Barcelona. — Gíraffarnir í dýragarðinum í Barcelona voru hressir.

Skoðaði Sagrada Familía, að innan sem utan.

Sagrada Familía í Barcelona. — Sagrada Familía, eitt helsta kennileiti Barcelona.

Fór til Girona

Svipmynd frá Girona. — Girona er skemmtilegur miðaldabær.

Sá rómverskar fornminjar í Tarragona

Leifar af rómversku hringleikahúsi í Tarragona á Spáni (Katalóníu). — Leifar af rómversku hringleikahúsi. Fórum ekki niður að þeim. Það var of heitt þennan dag.

Lærði hvernig á að elda paellu.

Paella, þjóðarréttur Katalóníu. — Alvöru spænsk, eða katalónsk paella.

Hékk í tjaldinu í Hjarta Hafnarfjarðar flestar helgar „sumarsins“, á meðan ég var ekki í útlöndum.

Greifarnir í tónleikatjaldinu í Hjarta Hafnarfjarðar, á laugardagskvöldi verslunarmannahelgar.

Greifarnir á balli í Hjarta Hafnarfjarðar sumarið 2025. — Þetta eru samt ekki Greifarnir þegar Felix Bergsson er ekki með þeim.

Synti í Vesturbæjarlauginni, á meðan hún var ekki lokuð vegna fúskvinnu verktaka.

Vesturbæjarlaugin í Reykjavík. — Vesturbæjarlaugin á einum af opnunardögum sumarsins.

Fékk mér kaffi með þessu fólki.

Starfsmenn Markaðs- og samskiptasviðs Háskóla Íslands í kaffi fyrir utan Háskólatorg. — Starfsmenn (eða hluti starfsmanna) Markaðs- og samskiptasviðs HÍ í morgunkaffi fyrir utan Háskólatorg: Sigurjón, Linda, Bryndís, Jón Örn og Bjössi.

Aðstoðaði vini í vanda á menningarnótt.

Trompetdeild Svansins fyrir utan Hörpu á menningarnótt. — Smá trompetahallæri hjá Svaninum. Trompetdeild Svansins í lúðrasveitabardaganum fyrir utan Hörpu á menningarnótt: Sonja, Björgvin, Atli og Hinrik.

Fór aftur til fortíðar og eignaðist plötuspilara.

Ísland, með Spilverki þjóðanna undir nálinni. — Nýi plötuspilarinn. Fyrsta platan sem sett var undir nálina á honum var Ísland með Spilverki þjóðanna.

Spilaði á nokkrum októberfestum um haustið, eins og venjulega.

Félagar úr Lúðrasveit Hafnarfjarðar á októberfesti á RVK brewing í Skipholti. — Nokkrir LH-félagar á októberfestgiggi hjá RVK-brewing: Atli, Egill, Ragnar og Rúnar.

Fór í vinnuferð til Vínar. En byrjaði í smá túristaleik þar. Skoðaði Stefánsdómkirkjuna.

Borðaði Sachertertusneið á Sacherhótelinu.

Skoðaði Schönbrunn-garðinn.

Schönbrunn-höllin í Vín. Hún var sumarbústaður Habsborgarafjölskyldunnar.

Fór á Drupal-ráðstefnu, m.a. með þessu fólki.

Drupalcon-ráðstefnan í Vín, október 2025. — Á Drupalcon-ráðstefnunni í Vín: Siggi, Linda, Hrafnhildur, Logi og undirritaður. (Og eitthvað fólk sem ég þekki ekki).

Ég og Drupal-kúlan í Vín.

Atli og Drupal-kúlan í Vín. — Drupal-kúlan hefur fylgt flestum Drupal-ráðstefnum frá því hún var haldin fyrst, árið 2005.

Tókst næstum því að kveikja í IKEA-geitinni.

Spilaði með þessu fólki í Víðistaðakirkju.

Lúðrasveit Hafnarfjarðar á æfingu fyrir tónleika í Víðistaðakirkju.

Bjó til laufabrauð fyrir jólin.

Útskorið laufabrauð, með stafnum A. — Útskorið laufabrauð.

Fór í aðventuferð til Kaupmannahafnar með þessu fólki.

Úti að borða á Nyhavns færgekro. — Á Nyhavns færgekro: Snorri, Íris, Atli, Herborg, Hildur, Gunnhildur og Gréta (mamma).

Skoðaði jólamarkaði í Kaupmannahöfn.

H.C. Andersen julemarked á Nytorv í Kaupmannahöfn.

Fór yfir Eyrasundsbrúna, til Malmö.

Skoðaði jólin í Tívolí.

Tívolí í Kaupmannahöfn. — Jólastemningin í Tívolíinu í Kaupmannahöfn.

Heimsótti Friðrik kóng.

Amalienborg, konungshöllin í Danmörku. — Amalienborg, heimili dönsku konungsfjölskyldunnar.

Sá Litlu hafmeyjuna.

Litla hafmeyjan í Kaupmannahöfn. — Den lille havfrue.

Labbaði upp í Sívalaturninn.

Sívaliturninn í Kaupmannahöfn — Sívaliturninn. Miðja Kaupmannahafnar.

Og kynnti mér kraftbjóramenningu Kaupmannahafnar.

Bjórglas á veitingastað í Kaupmannahöfn. — Einn af fjölmörgum handverksbjórum sem Kaupmannahöfn hefur upp á að bjóða.

Borðaði skötu á Þorláksmessu.

Skata og meðlæti. — Skata, saltfiskur og meðlæti.

Hélt upp á jól og hækkandi sólargang í lok ársins.

Jólatré í stofunni. — Jólatréð í stofu stendur.

Nýtti svo hlýindakaflann og snjóleysið í þrjá Helgafellsgöngutúra dagana milli jóla og nýárs.

Helgafell í Hafnarfirði — Helgafellið umlukið þoku.

Og nokkurnveginn svona lýkur árinu 2025.

Þakka öllum fyrir samveru og samskipti á þessu ári. Megi 2026 færa ykkur fullt af skemmtilegheitum, kærleik, gleði, gæfu, ást frið og allskonar.

Myndaannállinn 2024

31. desember, 2024 Atli

Þetta er búið að vera skrýtið ár. Skemmtilegt og leiðinlegt í bland. Það hafa skipst á skin og skúrir. Árið gaf og árið tók. Eins og venjulega hef ég lagt mig fram við að fylgjast ekkert með fréttum. Því það að fylgjast með fréttum er bara ávísun upp á leiðindi og þunglyndi. En ég kemst þó ekki hjá því að vita hvað er að gerast í þjóðfélaginu.

Á alþjóðavettvangi: Stríð í Úkraínu. Þjóðarmorð í Palestínu. Og þetta á bara eftir að versna! Appelsínuguli karlinn aftur að verða forseti í Ameríkuhreppi. Of mikið af geðsjúklingum og brjálæðingum við völd í heiminum. Meira kynþáttahatur, meira hatur gagnvart minnihlutahópum. Útlendingar óvelkomnir allsstaðar – og sérstaklega þeir sem hafa ekki rétta húðlitinn.

Á Íslandi: Útlendinga-„vandamál“. Sem er samt ekkert vandamál, heldur bara skilgreint sem vandamál af þeim sem vilja ekki útlendinga á Íslandi, og vilja kenna útlendingum um allt sem aflaga fer í stjórnkerfi landsins. Nokkur eldgos. Veit ekki hversu mörg. Hnífaárásir. Ung stúlka myrt í miðbæ Reykjavíkur. Íslensk ungmenni að vopnbúast og særa og drepa hvert annað. Verðhækkanir framundan. Verðbólgan étur launin okkar. Nýr forseti. Alþingiskosningar. Ný ríkisstjórn. Sjáum til hvernig henni gengur. Ríku- og frekukallarnir eiga samt eftir að fara á yfirsnúning af reiði út af henni. Sem er gott á þá!

Ég man ekki meira, og vil ekki rifja upp fleiri fréttir úr fjölmiðlum.

Fyrir mig hefur þetta þó verið ágætis ár, þrátt fyrir allt, svona þannig séð. Það hefur dálítið einkennst af ferðalögum. Hef aldrei farið í jafn margar flugferðir á einu ári. Flugviskubitið dálítið farið að segja til sín.

En rifjum upp hvernig þetta ár hefur verið hjá mér. Sem er tilgangurinn með þessari árlegu færslu. Því þetta er ekki vettvangur fíflagangs. Það er ekkert gamanmál hér á ferðinni. Hér er mynda- og myndbandaannáll ársins 2024.

Það byrjaði á sama stað og 2023 endaði, í Birkiberginu í Hafnarfirði.

Flugeldar og svifriksmengun yfir hrauninu í Setbergshverfinu í Hafnarfirði. — Flugeldar og svifryksmengun yfir Hafnarfirði. Þetta fór beint í lungun á mér og ég var hóstandi og með kvef í tvær–þrjár vikur eftir þetta. Note to self: Fara ekki út í kvöld að fylgjast með flugeldunum!

Amma kvaddi okkur í upphafi ársins.

Herdís Guðmundsdóttir, 1930–2024. — Herdís Guðmundsdóttir, 11. desember 1930 – 22. janúar 2024

Mætti á þessa tónleika í Hörpu.

Tónleikar í Hörpu 26. janúar 2024. — Egill Ólafsson heiðraður í Hörpu 26. janúar.

Fylgdist með mótmælum á Austurvelli.

Mótmæli á Austurvelli gegn þjóðarmorðum í Palestínu 5. febrúar 2024 — Mótmæli vegna þjóðarmorða í Palestínu.

Tók reglulega sundspretti í Vesturbæjarlauginni.

Vesturbæjarlaugin í Reykjavík á sólríkum vetrardegi. — Vesturbæjarlaugin á köldum en björtum vetrardegi.

Fylgdist með nokkrum eldgosum. Veit ekki hversu mörgum.

Háskólatorg og Lögberg. Fyrir miðri mynd sést mökkur af eldgosi. — Fyrir miðri mynd sést í mökkinn af febrúareldgosinu frá Aðalbyggingu Háskóla Íslands.

Mætti á árshátíð í Hörpu.

Á árshátíð Háskóla Íslands í Hörpu 9. febrúar 2024 — Árshátíðarfínn í Hörpu, á árshátíð Háskóla Íslands 9. febrúar.

Mætti á þorrablót með þessu fólki (og fleirum).

Þorrablót Syðr-Lónsættar 2024. — Á þorrablóti Syðra-Lónsættar 10. febrúar.

Mætti á Háskóladaginn.

Háskóladagurinn á Háskólatorgi 2024. — Háskóladagurinn á Háskólatorgi 2. mars.

Hélt upp á páskana með súkkulaðiáti.

Súkkulaði. Því ég nenni ekki lakkrís og hlaupi sem er í öllum páskaeggjum í dag.

Fór til Kaupmannahafnar 16.-21. apríl. Það voru nítján ár síðan síðast. Sama dag og ég kom þangað varð stórbruni í kauphöllinni Børsen. Ég var samt ekki að fikta með eld þarna. Hrós til íslenksra fjölmiðla sem notuðu fyrirsögnina Eldur í Kaupinhafn. (Samstöðin, Viðskiptablaðið).

Hluti af Kaupmannahöfn séður frá toppi Sívalaturnsins.

Með nokkrum af bestu vinnufélögum í heimi á NUASkom-ráðstefnunni í Kaupmannahöfn (þeim sem ég náði á mynd):

Samsett mynd. Björn, Hlín, Jón Örn, Sigfús, Linda, Marta, Bryndís, Kolbrún og Guðmundur.

Meira frá Kaupinhöfn:

Bragðað á bjórframleiðslu heimamanna í Kaupmannahöfn. Næstum því endalaust úrval af kraftbjór!

Á Íslendingaslóðum í Kaupmannahöfn. Þar sem Jónas H. drakk sinn síðasta sopa. Hvids vinstue.

Þarna endaði Jónas okkar svo ævi sína, e.t.v. eftir of marga sopa hjá Hvít.

Frá Kaupmannahöfn lá leiðin til Münchenar. Aðalmarkmið með komunni þangað var að heimsækja Frühlingsfest, sem er n.k. litla systir Októberfests.

Frühlingsfest á Theresienwiese í München. Litla systir Októberfestsins.

Augustiner-tjaldið á Frühlingsfest í München.

Sá DJ Ötzi eitt kvöldið á Frühlingsfestinu.

Þessi mættu líka til Münchenar, en án hljóðfæranna:

Nokkur af humlavinum Lúðrasveitar Hafnarfjarðar: Andrés, Brynjar, Ragnar, Egill, Eiríkur og Helena.

Spilaði fullt með þessu fólki, s.s. í skrúðgöngum, októberfestum, á tónleikum og allskonar.

Besta lúðrasveit landsins: Lúðrasveit Hafnarfjarðar.

Söng með þessu fólki:

Kammerkór Hafnarfjarðar á æfingu fyrir tónleika í Hafnarfjarðarkirkju.

Passaði þessa í smá stund.

Skoðaði Þingvelli – í leiðindaroki og rigningu. Íslenska sumarveðrinu.

Labbaði nokkrum sinnum upp á Helgafell, eftir því sem veður leyfði þetta sumarið. Mun þó ekki hafa komið þangað upp nema 18 sinnum á árinu.

Undirritaður uppi á Helgafelli í Hafnarfirði.

Hélt líka áfram að hjóla. Komst upp í rúmlega 7000 kílómetra á árinu. Þeir hefðu getað orðið rúmlega 8000. En það hlaut sviplegan endi 4. október þegar það var keyrt á mig og hjólið fór í hakk. Hef varla snert það síðan, einkum vegna veðurs og færðar. Það er samt allt í lagi með mig – og hjólið, eftir að það var búið í viðgerð og uppherslu. Tek þráðinn almennilega upp aftur þegar snjóa leysir og ófærðin verður yfirstaðin. Því það er ekki gert ráð fyrir öðru en bílaumferð yfir vetrartímann á Íslandi.

Hjólið á meðan allt lék í lyndi. 7000 kílómetrar hjólaðir 26. ágúst.

Hékk í Tjaldinu í Hjarta Hafnarfjarðar næstum því alla daga sem það var opið í júlí.

Fyrir utan Tjaldið í Hjarta Hafnarfjarðar í júlí.

Fjörðurinn fagri eitt sumarkvöld í júlí.

Tók þátt í lúðrabardaga á menningarnótt. Og vann!

Við svilarnir með Svaninum á menningarnótt. Atli og Sonja.

Fór með þessu fólki til Bad Orb í Þýskalandi:

Hluti af lúðrasveitinni Svaninum að gera sig tilbúna fyrir marseringu í Bad Orb.

Meira frá Bad Orb, í formi Instagram-sögu

Mætti til Egilsstaða með þessu fólki, og fleirum, á landsmót lúðrasveita.

Fór til Akureyrar í október.

Sá Litlu hryllingsbúðina í Samkomuhúsinu á Akureyri

Plantan Auður II í hryllingsbúðinni á Akureyri.

Undirbjó jólin, eftir því sem ég nennti.

Fór með þessu fólki til Glasgow, og smá til Edinborgar rétt fyrir jólin:

Á jólamarkaði í Glasgow. Atli, Gunnhildur, Íris, Gréta (mamma) og Snorri.

Sá Travis á tónleikum í Glasgow.

Á Travis-tónleikum í OVO Hydro í Glasgow, 21. desember.

Meira frá Glasgow (og Edinborg) samsett úr Instagram-sögu.

Hélt svo samkvæmt venju upp á jól og hækkandi sólargang síðustu viku ársins, með tilheyrandi letikasti, ofáti og öllu sem ég leyfi mér ekki að gera svona dags- daglega…

…eins og að borða Kókópuffs með Baileys útá.

Kókópuffs – Bara um jólin. Það er samt betra með mjólk útá!

Og þannig var nú það.

Þakka ykkur öllum fyrir samskipti og samveru á árinu sem senn er liðið, hversu mikil eða lítil sem þau voru. Með von um að þau verði enn betri, meiri og skemmtilegri á næsta ári. Og bara allt saman.

Munið svo að missa ykkur ekki alveg í flugeldageðveikinni í kvöld. Því sum okkar hata flugelda og geta ekki þetta svifryk! Það er sko hægt að gera meira en kaupa flugelda til að styrkja björgunarsveitir. Eins og að kaupa rótarskot. Eða bara styrkja þær án þess að fá nokkuð í staðinn, nema gleðina og ánægjuna.

Ást og friður til ykkar allra.
Gangið hægt um gleðinnar hurð.
Gerið allt á næsta ári sem ég mundi gera!

Á sama tíma að ári!

Herdís Guðmundsdóttir

2. febrúar, 2024 Atli

Fædd 11. desember 1930
Dáin 22. janúar 2024.

Hún amma er dáin. Þó að ég hafi verið búinn undir það nýlega að svona skyldi fara einhvern næstu daga var ég samt svo óviðbúinn því. Amma var kona sem ég hélt innst inni að yrði alltaf til staðar! En svona er þetta líf. Það er nú samt sæmilegur árangur hjá henni að ná þessum háa aldri. Því ná nú ekki allir!

Amma var sú yngsta af tólf systkinum sem fæddust og ólust upp á Syðra-Lóni á Langanesi á fyrri helmingi síðustu aldar og sú síðasta sem var eftirlifandi úr systkinahópnum. Þau ólust upp lengst norður á landi. Svo kynntist hún afa. Hann var fæddur og uppalinn vestast á Vestfjörðum. Lengra út á landið í hvora áttina er varla hægt að komast. En einhvernveginn það æxlaðist að þau hittust, komandi hvort úr sínum fjarlæga landshlutanum. Og þau hófu búskap í enn einum landshlutanum, í Borgarnesi. Þaðan man ég eftir þeim. Ömmu og afa í Borgó.

Syðra-Lón á Langanesi. Um 90 árum eftir að amma fæddist.

Í Borgarnes var gott að fara til að komast í burt frá þessu öllu. Burt frá raunveruleikanum, hversdagslífinu og áhyggjum daglegs lífs. Þórólfsgatan var Borgarnes. Borgarnes var Þórólfsgatan. Þar var öryggi æskuáranna.

Þórólfsgata 20 í Borgarnesi. Þórólfsgatan var Borgarnes. Borgarnes var Þórólfsgatan.

Í Borgarnesi gisti ég í fyrsta skipti að heiman, fjarri pabba og mömmu. Í skáparúminu í svefnherberginu hjá ömmu og afa. Og líklega öll barnabörnin sem á eftir komu. Við elskuðum öll skáparúmið. Þangað til við vorum orðin of stór til að sofa í því.

Í ömmu var öryggið. Hún sá til þess að ég hefði það sem best á meðan ég gisti hjá henni. En hún var líka hæfilega frjálsleg í uppeldinu, eins og ömmur eiga að vera. Hvar annars staðar en hjá ömmu fékk maður kókópuffs í morgunmat á þriðjudegi eða appelsín, kók eða sykrað appelsínudjús með hversdagskvöldmatnum?

Með ömmu í Borgarnesi, líklega jólin 1979.

Amma var sáttasemjarinn. Hún vildi hafa öll barnabörnin jöfn og að þau sætu öll við sama borð. Jæja, ókei þá. Litlu stelpurnar máttu vera með á fundum Leynifélagsins. En stóru krakkarnir áttu það samt og réðu. Litlu stelpurnar fengu að vera með, af því að amma sagði það. En þó bara að nafninu til, á pappírunum.

Hún naut þess að ferðast. Hvort sem það voru skreppitúrar upp í bústað eða ferðalög til framandi landa. Eða eitthvað þar á milli. Amma og afi fóru í ótal ferðalög til nálægra og fjarlægra landa, að mér fannst. Og þau kunnu að tala útlensku! Og fram að unglingsárum gat maður verið viss um að fá frá þeim einhverja minjagripi frá þessum útlöndum þegar þau kæmu heim.

Ég fór eitt skipti með þeim til Stokkhólms, ásamt hluta fjölskyldunnar. Siglingar um sænsku skerjagarðana. Dagsferð til Álandseyja. Gisting í aflögðu fangelsi á Långholmen. Stokkhólmur var snilld.

Í Stokkhólmi 2006. Frá vinstri: Ægir, Gunnhildur, Atli, Gréta, Herdís og Páll.

Afi og amma í Stokkhólmi. Fá sér smá hressingu í göngutúr um Långholmen.

Svo var Þórólfsgatan ekki lengur. Amma og afi ákváðu að minnka við sig og fluttu í Hamravíkina. Nýja húsinu fylgdi þó sama hlýjan og öryggistilfinning æskuáranna sem maður fékk við að koma upp í Borgarnes. Þó að fullorðinsárin væru nú tekin við. Þar var afi með henni í tæpt ár, áður en hann dó. En stórfjölskyldan hélt áfram að hittast heima hjá ömmu. Hamravíkin var nógu stór til að við kæmumst þar öll fyrir. Nýja húsið tók við sem félagsheimili fjölskyldunnar.

Hamravík 2 í Borgarnesi. Þar bjó amma síðustu árin.

Amma tók húsmóðurhlutverkið alvarlega. Enda var hún húsmæðraskólakennari. Öll matarboðin á gamlárskvöld og grillveislurnar á sumrin. Og reyndar á öllum öðrum árstímum líka. Hún leit á það sem sitt hlutverk að sjá til þess að allt væri komið á borðið og öll væru með nógan mat á disknum. Það kom ekki til greina hjá henni að setjast niður og slaka á. Jafnvel þó við værum orðin fullorðin og gætum bjargað okkur sjálf. Undir stjórn ömmu skyldu allir vera með nóg að borða og drekka. Alltaf!

Stórfjölskyldan í Würzburg 2010. — Stórfjölskyldan í Würzburg 2010

Ferðalögin urðu fleiri. Fjöruferðir um páskana voru fastur liður hjá stórfjölskyldunni. En ferðir til fjarlægari staða voru líka á dagskrá. Til Würzburgar í Þýskalandi og Edinborgar í Skotlandi. Og útilegur víða um landið. Til dæmis á Snæfellsnesi. Í einni útilegunni stoppuðum við í Rauðfeldsgjá á Snæfellsnesi. Mér fannst það töff hjá áttræðri konunni að ganga alla þessa leið upp í gjána. Öll þessi ferðalög með ömmu með í för hafa skapað ógleymanlegar minningar.

En nú er þessu lokið hjá ömmu. Hér væri hægt að minnast á svo margt annað. En hér er bara stiklað á stóru. Örfá minningabrot sem koma upp í hugann, svona rétt eftir að hún er farin. Nú er hún ef til vill einhversstaðar á göngu inni í eilífðinni með afa, þ.e. ef við trúum á líf eftir þessa jarðvist. Eða að skemmta sér einhversstaðar með systkinum sínum, öllum saman.

Ég er þakklátur fyrir þennan tíma sem hún var hluti af lífi mínu. Takk fyrir allt saman, amma! „Að hugsa til þín, það gerir mér gott. Ég finn styrk í því þó sért farin á brott,“ söng Mugison nýlega. Það ættu allir að eiga svona ömmu!

Myndaannállinn 2023

31. desember, 2023 Atli

2023 er senn liðið í aldanna skaut og aldrei það kemur til baka. Kannski því miður? En kannski sem betur fer? Hvernig var svo þetta ár, svona í stóra samhenginu?

Jarðskjálftar. Eldgos. Meiri jarðskjálftar. Meira eldgos. Grindavík ónýt. Allir þessir jarðskjálftar og svo bara tvö lítil og aumingjaleg eldgos! Mér finnst ég hafa verið svikinn. Að upplifa alla þessa jarðskjálfta til einskis!

Stríð. Þjóðernishreinsanir – og enginn sem vald hefur gerir neitt í því! Útlendingahatur á Íslandi. Fólk sem er ekki nógu hvítt fyrir Ísland sent út á götuna. Eða til útlanda út í dauðann. Eða handtekið fyrir að vera of hörundsdökkt.

Verkföll, ef ég man rétt. Spilltir pólitíkusar. Vanhæf ríkisstjórn. Ónýt ríkisstjórn. Stýrivaxtahækkanir. Ónýtur gjaldmiðill og endalaust dýrt að lifa á Íslandi. Hvenær fáum við evru á Íslandi? Nei… bara djók. Það má ekki tala um það. Því svona viljum við hafa það.

Að öðru leyti man ég ekki, frekar en venjulega, hvað hefur verið í fréttum á árinu. Og við skulum ekkert vera að rifja upp fréttatengd málefni. Er það ekki bara ávísun upp á fýlu og þunglyndi?

En þrátt fyrir allt hefur þetta verið ágætis ár fyrir mig. Ég gerði mér engar vonir í upphafi. Kannski það hafi haft eitthvað að segja?

Rifjum nú upp hvernig þetta var hjá mér, a.m.k. út frá nokkrum myndum og myndböndum sem ég tók á árinu.

Það hófst á sama stað og því síðasta lauk: Í Hafnarfirði.

Flugeldar í Birkibergi í Hafnarfirði — Flugeldar og svifriksmengun í Birkibergi.

Djammaði með Gylfa Ægis.

Við Ægissynir á Ölhúsinu, einu sinni sem oftar þetta árið.

Lífið fór smám saman að færast í eðlilegt horf eftir Covid-smit og samkomutakmarkanir undanfarinna ára. Mætti loksins aftur á Þorrablót Syðra-Lónsætttar.

Þorrablótsnefndin 2021-2023 (eða hluti af henni): Herborg, Aldís Eva og Atli.

Tók nokkra sundspretti í Vesturbæjarlauginni.

Vesturbæjarlaug 8. febrúar. Eitt af merkjum um að þú búir á Íslandi: Það þykir eðlilegt og sjálfsagt að fara í sund úti í stormi og hríðarbyl.

Mætti á og tók þátt í Háskóladeginum.

Grágás, lukkudýr laganema við HÍ. — Grágás, lukkudýr laganema við HÍ, til sýnis á háskóladeginum 4. mars.

Spilaði með þessu fólki í Hörpu:

Lúðrasveit Hafnarfjarðar fyrir tónleika í Norðurljósum, Hörpu, 13. mars 2023. — Lúðrasveit Hafnarfjarðar fyrir tónleika í Norðurljósum, Hörpu, 13. mars.

Sá Mugison á tónleikum.

Mugison á tónleikum í hátíðarsal Háskóla Íslands 24. mars 2023. — Mugison á tónleikum í hátíðarsal Háskóla Íslands 24. mars.

Hitti Guðna okkar á öðrum tónleikum.

Við Guðni forseti á tónleikum Lúðrasveitar Verkalýðsins í Hörpu 26. mars.

Labbaði nokkrum sinnum upp á Helgafell. Mun hafa komið á toppinn 18 sinnum þetta sumarið.

Yðar einlægur uppi á Helgafelli. — Yðar einlægur uppi á Helgafelli í fyrsta sinn á þessu ári, 6. apríl.

Fékk ekki páskaegg um páskana, heldur bara súkkulaði. Og nóg af því! Því ég nenni ekki öllu þessu hlaupi og lakkrís sem er inni í páskaeggjum núna.

Ósamsett IKEA-páskaegg: Súkkulaði og málsháttabók.

Spilaði í skrúðgöngu í fullum fjólubláum skrúða á sumardaginn fyrsta.

Í skrúðgöngu í Hafnarfirði á sumardaginn fyrsta.

En þetta var stutt sumar, því það kom eiginlega strax vetur aftur!

Ísland, ertu ekki að grínast??? Þessi mynd er frá 27. apríl! Ekki febrúar, heldur apríl!!!

Sá Valdimar í Bæjarbíói í Hafnarfirði.

Valdimar í Bæjarbói 30. apríl 2023. — Valdimar í Bæjarbói 30. apríl.

Fór í jarðfræðiferð um Reykjanes ásamt starfsfólki í stjórnsýslu Háskóla Íslands, undir leiðsögn Ármanns Höskuldssonar.

Yðar einlægur að spila á píanó úti ár Reykjanestá, þau sömu og voru notuð í Júróvísjón-myndinni.

Lærði ýmislegt skemmtilegt og áhugavert um Ísland og Reykjanes í þessu ferðalagi. Tvö myndbönd, tekin í Eldvörpum:

Næsta eldgos á Reykjanesi að mati jarðfræðings.

Á landamærum Evrópu og Ameríku!

Hélt bíllausa lífstílnum áfram:

Bíllausi lífstíllinn að gefa!

Komst upp í 3000 kílómetra…

3000 kílómetrar hjólaðir 7. ágúst 2023. — 3000 kílómetrar hjólaðir 7. ágúst.

… og 4000 kílómetra.

4000 hjólaðir kílómetrar 3. október 2023. — 4000 kílómetrar hjólaðir 3. október.

Fór upp í bústað við Geysi um hvítasunnuhelgina.

Sumarbústaður við Geysi, séður frá trampólíninu. — Sumarbústaður við Geysi, séður frá trampólíninu, eina góðviðrisdaginn þá vikuna.

Skoðaði Friðheima

Þessi kvaddi á árinu:

Fór með þessu fólki til Ítalíu:

Kammerkór Hafnarfjarðar og stuðningsfulltrúar fyrir utan dómkirkjuna í Lucca á Ítalíu.

Aðeins meira frá Ítalíu:

Riomaggiore, eitt af þorpunum á Cinqueterre-svæðinu.

Útsýni frá öðru þorpi á Cinqueterre-svæðinu. Man ekki hvað það heitir.

Bjór- og tásumynd frá ströndinni í Massa á Ítalíu. Eitthvað hljóta stýrivextirnir nú að fara að hækka!

Frá Ítalíu lá leiðin til Zürich í Sviss, í ferðalag með þessu fólki:

Lúðrasveit Hafnarfjarðar á útitónleikum í Zürich.

Trompetdeild LH (eða hluti af henni) í Zürich. — Trompetdeild LH (eða hluti af henni) í Zürich: Andrés, Eiríkur og Atli.

Skoðuðum vínbúgarðinn og fórum í vínsmökkun hjá Höskuldi.

Dvergkindurnar sem aðstoða við vínræktina.

Það er til flutningafyrirtæki í Þýskalandi/Austurríki sem heitir Transkona. Varð bara að koma því að hér:

Flutningabíll frá Austurríska/Þýska fyrirtækinu Transkona. — Flutningabíll frá Þýska/Austurríska fyrirtækinu Transkona.

Fer ekki með lúðrasveitinni til útlanda án þess að koma við í München:

Atli með Augustiner-bjór — Á uppáhalds-staðnum mínum í München: Augustiner-bjórgarðinum.

Með hinum hlutanum af trompetdeild LH: Þorleikur, Þórhildur og Atli.

Spilaði í Augustiner-bjórgarðinum.

Lúðrasveit Hafnarfjarðar að loknum tónleikum í Augustiner-garðinum.

Kom svo heim frá útlöndum og mætti í Tjaldið í Hjarta Hafnarfjarðar. Hékk þar næstum því allar helgar í júlí:

Papaball í Tjaldinu í Hjarta Hafnarfjarðar.

Meira úr Hjarta Hafnarfjarðar. Og allt þetta fólk sem var þarna líka! Sjáum nokkur þeirra:

Nokkrir LH-félagar í Hjarta Hafnarfjarðar.

Fór líka upp á Betri stofuna, í turninum í Firði.

Kyrrlátt kvöld við Fjörðinn. Útsýnið frá turninum í Firði.

Fór í bað í Kraumu í Borgarfirði.

Sá reykinn af fyrra eldgosi ársins frá toppi Helgafells.

Atli á toppi Helgafells. Reykurinn frá eldgosinu í bakgrunni. — Á toppi Helgafells. Reykurinn frá júlí-eldgosinu í bakgrunni.

Mætti á Menningarnótt í Reykjavík

Lúðrabardagi…

Lúðrasveitir fyrir utan Hörpu. — Lúðrabardagi fyrir utan Hörpu.

…Porsche-sýning…

Svartur Porsche, með einkanúmerið TURBO. — Flottur Porsche í gamla Kolaportinu.

…og bjór. Hvað þarf maður meira á Menningarnótt?

Kaldi í stóru glasi. — Bjór er nauðsynlegur á löngum göngutúrum um miðborg Reykjavíkur.

Mætti á og tók þátt í árgangagöngu á Ljósanótt í Reykjanesbæ, í hávaðaroki og rigningu.

Fulltrúar Hafnarfjarðar í árgangagöngunni á Ljósanótt í Reykjanesbæ: Ásgeir, Brynjar og Atli.

Spilaði á nokkrum októberfestum, eins og venjulega.

Hluti af trompetdeild Lúðrasveitar Hafnarfjarðar á einu af októberfestum haustsins: Atli, Björk og Ingibjörg.

Spilaði með þessu fólki á tónleikum í Víðistaðakirkju:

Sá Baggalút á tónleikum.

Gerði laufabrauð

Fjögur laufabrauð með stöfum sem mynda orðið ATLI. — Hefðbundna laufabrauðs-nafnamyndin.

Söng á tónleikum með þessu fólki:

Kammerkór Hafnarfjarðar á æfingu í Hásölum.

Sá bjarmann af desembergosinu frá þaksvölunum:

Bjarminn af eldgosinu í Sundhnúkagígaröðinni 18. desember, séður frá miðbæ Hafnarfjarðar.

Borðaði skötu á Þorláksmessu.

Hélt upp á hækkandi sólargang síðustu viku ársins.

Jólatréð í stofu stendur... — Jólatréð í stofu stendur…

Um það bil þannig endar þetta ár.

Hér vantar reyndar fleiri bjórmyndir. En það lætur mig líta illa út að birta allar þessar bjórmyndir sem ég tók á árinu. Hér er þó ein, valin af handahófi:

Að lokum vil ég þakka ykkur öllum sem komuð við sögu hjá mér á árinu, sama hversu lítið eða mikið það var, og sama hvort þið lentuð í þessum myndaannál eða ekki.

Eins og síðast ætla ég ekki að jinxa þetta og segja ég að ég sé til í tuttuguogfjögur. Nei – ég ætla ekki að gera mér neinar vonir um næsta ár. Það sem kemur mun koma og við verðum að takast á við það.

En ég vona að næsta ár færi okkur ennþá meiri gleði, hamingju, meiri og betri samverustundir og samskipti heldur en árið sem er að líða. Og bara alls konar gott og skemmtilegt.

Því ég lifi í voninni!

Ást og friður, krakkar mínir – við þurfum svo sannarlega á hvoru tveggja að halda nú um stundir.

Takk fyrir mig 2023!

Myndaannállinn 2022

31. desember, 2022 Atli

Hvað segiði? 2022 bara að klárast?

Þetta hefur nú verið meira árið! Ekkert slæmt ár, en heldur ekkert gott, svona í stóra samhenginu.

Stríð í Úkraínu. Jarðskjálftar. Eldgos sem var búið áður en það byrjaði. Hatrið allsráðandi. Kynþáttahatur. Útlendingahatur. Hatur gegn hinsegin fólki.

Pælið í því að vera svo fastur inni í sínum þrönga kassa að geta ekki unnt öðrum þess að lifa lífi sínu eins og þau kjósa það sjálf.

Og pælið í Íslendingum að vera með útlendingahatur!

Í heiminum búa rúmlega 8 milljarðar (8.000.000.000). Um það bil 380.000 þeirra eru Íslendingar. Við erum um 0,000047% af jarðarbúum. Sem þýðir að ef þú ert Íslendingur og velur manneskju af handahófi einhversstaðar úr heiminum eru u.þ.b. 99,999953% líkur á að þú sért útlendingur í hennar augum. Íslendingum fer því ekkert vel að vera með þetta útlendingahatur. Né nokkrum öðrum heldur, ef út í það er farið.

Takið þessar hugsanir með inn í nýja árið og leyfið fólki bara að vera það sem það er, á meðan það skaðar ekki aðra!

Og hvað meira?

Wannabe-hryðjuverkamenn handteknir á Íslandi. Er það ekki bara afsökun fyrir lögguna til að fá að ganga um með byssur? Nú á hún a.m.k. að fá að ganga með rafbyssur. Eða rafvarnarvopn? (Er það orð? Það er það núna! Note to self: Bæta þessu orði við Orðabókina).

Já, og svo bæjarstjórnarkosningar. Framsóknarflokkurinn allsstaðar!!!??? Eruði ekki að grínast???

Að öðru leyti man ég ekkert hvað gerðist á þessu ári. Því ég fylgist ekkert með fréttum. Því ég þoli ekki þjóðmála- og dægurmálaumræðu. Ég man varla hvað ég gerði sjálfur á þessu ári. En er búinn að fara yfir myndir sem ég tók á árinu. Það hjálpar mér að rifja upp hvað ég gerði.

Einhvernveginn svona var árið 2022 hjá mér:

Það byrjaði á sama stað og hið fyrra endaði: Í Hafnarfirði.

Flugeldar og rykmengun yfir Setbergs- og Áslandshverfinu í Hafnarfirði. (Hvenær ætlum við að banna flugelda? Flugeldakaup eru ekki eina leiðin til að styrkja björgunarsveitirnar!)

Tók nokkra sundspretti í Suðurbæjarlauginni. Reyndar líka í Vesturbæjarlauginni í Reykjavik, en tók ekki mynd af henni.

Fór aftur að vinna heima vegna samkomutakmarkana og veiru.

Heimavinna — Háskóli Íslands, Hafnarfirði, góðan daginn.

Fór að rifja upp fingrasetningu á trompetinn þegar samkomutakmörkunum lauk.

Fingrasetningin rifjuð upp. Bjórinn ekki langt undan.

Mætti aftur til starfa í Háskólanum þegar samkomutakmarkanir voru blásnar af.

Brú á milli bygginga: Hótel Saga og Aðalbygging.

Sá forsetabílinn.

Forsetabíllinn fyrir utan alþingishúsið. Takið eftir skiltinu: „Bifreiðastöður bannaðar“.

Kom í fyrsta sinn upp á Grillið á (fyrrverandi) Hótel Sögu.

Grillið. Útsýni yfir Háskólasvæðið og Vatnsmýrina. Það væri nú ekki amalegt að vera með skrifstofu þarna!

Sá Jesus Christ Superstar í Hörpu.

Fór í vinnuferð til Portland, Oregon, með þessu fólki:

Í lest í Portland, Oregon — Yðar einlægur ásamt vef- og forritarateymi Háskóla Íslands: Hrafnhildur, Logi, Siggi og Anna María. Það var ennþá grímuskylda þarna á vordögum.

Og smá meira frá Portland:

Elti hvítu kanínuna:

Eltu hvítu kanínuna! — Yðar einlægur og hvíta kanínan á Drupal-ráðstefnunni í Portland, Oregon.

Drupal-ráðstefnan:

Drupal-kúlan — Ég fyrir framan Drupal-kúluna í Portland.

Ráðstefnumiðstöð Oregon. Eða, bara hluti af henni:

Oregon convention center — Ráðstefnumiðstöð Oregon. Harpan okkar í Reykjavík bliknar og blánar í samanburði við þessa byggingu.

En náðum samt alveg líka að kynna okkur skemmtanalífið í Portland. Á hótelbarnum var t.d. hægt að fá íslenskt brennivín:

Drykkir á hótelbarnum — Frá barnum á Hótel Canopy by Hilton í Portland, Oregon. á miðri mynd sést íslenskt brennivín.

Spilaði með þessu fólki:

Þurfti að leita á Bráðamóttökuna í Fossvogi á vordögum vegna gamalla hnémeiðsla. Þau hafa þó að mestu leyti gengið til baka þegar þetta er ritað.

Skoðaði miðbæ Selfoss…

… og hellana á Hellu ásamt starfsfólki HÍ

Inni einum af hellunum á Hellu. — Inni í einum af hellunum á Hellu.

Kom nokkrum sinnum upp á Betri stofuna í turninum í Firði þetta sumar:

Hafnarfjörður séður frá öðrum turninum í Firði. Hann er fallegur Fjörðurinn á svona dögum!

Fór með þessu fólki í ferðalag um Borgarfjörð:

Lúðrasveit Hafnarfjarðar að spila við Deildartunguhver/Kraumu í Borgarfirði.

Vaknaði fyrir allar aldir 17. júní þetta ár, og fór með lúðurinn upp á Hamarinn:

17. júní 2022 — Hér sést hvað undirritaður er nývaknaður. Vissi ekki að klukkan gæti orðið 8 fyrir hádegi á 17. júní!

Mætti reglulega í partýtjaldið í miðbæ Hafnarfjarðar, á bæjarhátíðinni Hjarta Hafnarfjarðar, þetta sumar:

Fékk mér hjól og fór að hjóla.

Nýja Conway-rafmagnshjólið — Nýja rándýra Conway-rafmagnshjólið.

Sá Sigga Hlö í Tjaldinu:

Hlö-maðurinn ásamt dyggum aðdáendum í Tjaldinu í Hjarta Hafnarfjarðar.

Komst nokkrum sinnum upp á Helgafellið í Hafnarfirði, þrátt fyrir alvarleg hnémeiðsli þetta sumarið. Mun bara hafa komið þangað þrisvar sinnum þetta árið. Það verður þó auðvelt að toppa það á næsta ári.

Uppi á Helgafelli. Ef myndin prentast vel má sjá mökkinn af eldgosinu í Fagradalsfjalli í bakgrunni.

Helgafellið mitt:

Þessi hreiðraði um sig hjá mér í sumar. Ég sakna hennar smá. Vona að hún (eða einhver afkomandi hennar) komi aftur til mín næsta sumar:

Sá Hringadróttinssögu í Hörpu.

Veiran skæða náði mér um miðjan ágúst. Í fyrsta sinn, svo vitað sé. Einmitt þegar það var ekki í tísku lengur. En slapp þó vel frá henni.

Með covid. — Það hlaut að koma að þessu. Kominn með Covid. Einmitt þegar það er ekki vinsælt lengur.

Fór til Bad Orb í Þýskalandi í september, ásamt þessu fólki. Vona að ég fái að koma með aftur næst þegar þau fara:

Með Kärrners-bjór í Bad Orb.

Með bjór í Bad Orb. — Þjóðverjar kunna að brugga bjór.

Hluti af trompetdeildinni, misvel á sig komin.

Trompetdeild Svansins 2022 í Bad orb. (Og líka gestahljóðfæraleikarar úr LH).

Lúðrasveitamót í Bad Orb. (Má maður kalla annað lúðrasveitafólk en sitt eigið lúðrasveitanörda?)

En náðum samt alveg líka að skemmta okkur og drekka smá bjór, þrátt fyrir mikið spil.

Yðar einlægur með Kärrners-bjór í Bad Orb.

Söng með þessu fólki:

Kammerkór Hafnarfjarðar á æfingu fyrir tónleika í Hafnarborg.

Fór á Selfoss með þessu sama fólki:

Nokkrir félagar og fylgihlutir úr Kammerkór Hafnarfjarðar á Selfossi.

Fleiri kórfélagar og fylgihlutir á Selfossi.

Fleiri kórfélagar og fylgihlutir úr Kammerkór Hafnarfjarðar á Selfossi.

Mætti á árshátíð Háskóla Íslands, eftir þriggja ára hlé.

Páll Óskar tryllir lýðinn. — We work hard – we play hard. Páll Óskar tryllir lýðinn á árshátíð HÍ.

Spilaði á nokkrum októberfestum.

Fór til Akureyrar í byrjun nóvember

Spilaði á tónleikum í Hofi, Akureyri.

Spilaði meira. Hér er ein af tónleikum í Víðistaðakirkju:

Á tónleikum heima hjá Jesúsi, í Víðistaðakirkju. — Á tónleikum Lúðrasveitar Hafnarfjarðar, heima hjá Jesúsi, í Víðistaðakirkju.

Fór í viðtal hjá RÚV um orð ársins. Það er samt ekki búið að flytja viðtalið ennþá, þegar þetta er ritað.

Fyrir utan RÚV. Skyldumynd þegar utanaðkomandi fólk leggur leið sína í þessa byggingu.

Tók bassatrommusóló á tónleikum með þessu fólki

Undirritaður ásamt Kammerkór Hafnarfjarðar

Bjó til laufabrauð

Fór á jólatónleika Baggalúts

Borðaði skötu á Þorláksmessu

Reyndi að halda upp á hækkandi sólargang núna í lok ársins. Nennti þessum jólum samt engan veginn. Finnst seinnipartur desember sífellt verri og verri eftir því sem ég eldist.

Er að verða meiri og meiri Grinch með hverju árinu sem líður.

Og svo eru það allar bjórmyndirnar sem ég tók. Það lætur mig líta illa út að birta þær allar. En hér er ein:

Skál fyrir 2023!

Svalabjór í fallegu veðri. Fríkirkjan í Hafnarfirði í baksýn.

Og svona endar þetta ár.

Hafið það gott um áramótin. Gangið hægt um gleðinnar dyr og gerið allt sem ég mundi gera!

Gleðilegt nýtt ár og takk fyrir það gamla. Ég ætla ekki að jinxa þetta og segja að ég sé svo mikið tilbúinn í 2023. Því það er bara ávísun upp á að næsta ár verði ömurlegt.

Takk fyrir samskipti og samveru á árinu 2022, hversu mikil eða lítil sem þau voru. Megi 23 færa okkur miklu meiri gleði, hamingju og samveru (og þá meina ég samveru í raunveruleikanum, en ekki rafræn samskipti) heldur en þetta ár.

Sjúkrasagan

18. maí, 2022 Atli

Frétt í framvindu

Hvernig byrjaði þetta?

Það var fimmtudaginn 5. maí 2022.

Ég var búinn að vera með smá verk í hnénu þennan dag, eins og ég fæ stundum. Kannski eitthvað vitlaust álag eftir sundið sem ég fór í daginn áður. Ég fór í göngutúr eftir vinnu, til að reyna að ná verknum úr mér, eins og hefur virkað þegar þessi verkur tekur sig upp.

Ég var kominn niður á Austurvöll. Þá finn ég að það brakar og brestur eitthvað í hnénu. Eins og ég sé að fara úr lið, eða eitthvað. Og það verður allt í einu ógeðslega vont að stíga í fótinn.

Ég náði þó að skakklappast yfir í Stóra gula bílinn og fara með honum heim. Þegar heim var komið setti ég eitthvað teygjuband utan um hnéð. Það styður aðeins við. En ég er ennþá jafn aumur.

Slysó

Helgina notaði ég til að spila á tónleikum og fara í partý eftir tónleikana. Það kom ekki til greina að sleppa þessum viðburðum þrátt fyrir meiðslin. Ég var búinn að komast að því hvernig ég ætti að stíga í fótinn án þess að það yrði sárt.

Mánudaginn 9. maí fór ég svo upp á bráðamóttöku til að láta líta á þetta. Ég fór í röntgenmyndatöku. Niðurstöður hennar voru þær að þetta væri svokölluð liðmús. Þ.e. bein- eða brjóskflís sem flækist út í liðamótin.

Læknirinn á bráðamóttökunni ráðlagði mér að panta tíma hjá heimilislækni, til að fá vísun til bæklunarlæknis. Nánast strax við heimkomu panta ég tíma hjá heimilislækninum. En bara símatíma. Því ég held að það sé nóg. Líður nú og bíður.

Hvað segir læknirinn?

Níu dagar. Ég er misjafn. Get stundum gengið með teygjubandið utan um mig. En bara hægt. Jafnvel gengið stuttar vegalengdir innandyra án þess að vera með hlífina. Get tekið til, þurrkað af, ryksugað og skúrað heima hjá mér. Aðrir dagar eru verri. Þá vildi ég helst vera með staf, hækju eða hjólastól.

Að morgni miðvikudagsins 18. maí hringir læknirinn í mig. Ég falast strax eftir þessari tilvísun sem bráðamóttökulæknirinn mælti með. En heimilislæknirinn hefur strax sínar efasemdir.

Það er margra mánaða bið eftir að komast að hjá bæklunarlækni. Næsta skref er því að fara í segulómskoðun á heilsugæslunni til að skoða þetta betur. Því röntgenmyndir segja ekki endilega alla söguna. Enn tekur við bið, takk fyrir. Eða fram til 30. maí. Og ég hef á tilfinningunni að þetta sé ekki síðasta biðin í þessari sögu.

Hjá Heilsugæslunni

Bið, endalaus bið, sem bara styttist ei neitt.

Þessir tólf dagar líða. En ég er samt allur að skána. Er samt alltaf með stuðningshlífina utan um hnéð.

Ég get gengið sífellt lengri vegalengdir innanbæjar, á jafnsléttu, og líka stuttar, aflíðandi brekkur. Get líka gengið upp og niður tröppur, og jafnvel án þess að styðja mig við handrið. Fer í stutta göngu úti í guðsgrænni náttúrunni einn daginn.

Er sífellt minna og minna haltrandi ef ég er með stuðningshlífina. En stíg samt ennþá laust í fótinn. Treysti mér líka til að vera án hlífarinnar innanhúss, heima hjá mér.

Og það kemur að læknisheimsókninni.

Ég afklæðist og sýni lækninum hnéð. Hún þuklar það, beygir og sveigir, en ég finn ekkert til á meðan. Hún sér því ekki ástæðu til að ég fari í áðurnefnda segulómskoðun – a.m.k. ekki strax. Tekur þó eftir einhverri bólgu eða liðvökva og skrifar upp á bólgueyðand lyf. Vill ekki fara út í frekari aðgerðir, t.d. stinga á bólguna, af ótta við að það geri illt verra. Gefur mér líka tilvísun í myndgreiningu. Ég ætti þó ekki að nýta mér hana strax. Heldur bíða og sjá hvernig þetta þróast með sumrinu.

Ég ætti því að geta haldið áfram að ganga – jafnvel farið í sund og fjallgöngur aftur – ef ég bara byrja rólega – eftir því sem tíminn líður.

Framhald síðar.

Myndaannállinn 2021

31. desember, 2021 Atli

Ætlar þetta hræðilega ár aldrei að enda???

Hvað er hægt að segja um þig, 2021? Þú varst engu skárra en forveri þinn.

Þú heilsaðir og kvaddir með Covid. Það mátti næstum því ekkert hittast og hafa gaman fyrir þessari veiru!

Svo fengum við jarðskjálfta. Ég kippi mér ekki lengur upp við þá, þó þeir séu stundum óþægilegir. Það er eitthvað súrt við það að vita upp á hár hvað þeir eru stórir og hvar þeir eiga upptök sín, eftir því úr hvaða átt þeir koma. En við fengum þó þetta glæsilega eldgos líka, í bónus frá öllum skjálftunum.

Þú byrjaðir af bjartsýni. Komið bóluefni gegn þessum hræðilega smitsjúkdómi! En þetta reyndist skammvinn bjartsýni. Því bóluefnið reyndist ekki virka eins vel og við vonuðum. Enn eru menn að smitast. Íslandsmeistaramótið í Covid stendur nú sem hæst og ekkert útlit fyrir að því ljúki. Og sumir láta ekki bólusetja sig. Sumir af góðum og gildum heilsufarsástæðum. En sumir eru bara hálfvitar. Eða kóvitar.

Og það sem hægt er að rífast um bólusetningar og sóttvarnarráðstafanir! Við erum ekkert saman í þessu lengur! Þessi faraldur hefur sundrað okkur meira en að sameina. Sumir verða bara að hafa frelsi einstaklingsins til að sleppa við sóttkví, ganga um óáreittir og taka áhættuna á því að smita aðra!

Stundum nenni ég bara ekki Íslandi!

Og kosningar. Tækifæri til breytinga. En við kusum sama fólkið yfir okkur aftur. Eða þið, en ekki ég! Stundum nenni ég ekki Íslendingum! Og við komumst að því að Borgnesingar kunna ekki að telja.

Ný Metoo-bylgja. Gamlir hræddir karlar af öllum kynjum, á öllum aldri, ósáttir við að það megi ekkert lengur (það hefur aldrei mátt, það vita það bara fleiri núna!) og jafnvel… að konur séu að taka af þeim völdin. Það yrði nú hræðilegt!

Þetta er svona það helsta sem ég man eftir úr fréttum.

En fyrir mig hefur þetta ár verið sæmilegt þrátt fyrir allt. Ég fékk ekki Covid. En það er bara tímaspursmál hvenær það verður. Ég verð illa svikinn ef frú Ómíkron bankar ekki upp á hjá mér áður en næsta ár verður hálfnað. Hef heldur ekki misst neinn nákominn úr veirunni.

Náði líka að ferðast eitthvað. Þó bara innanlands. Mig langar að komast til útlanda aftur!

Náði meira að segja að spila og syngja á tónleikum og njóta nokkurra menningarviðburða og fara á barinn á meðan veiran hvíldi sig aðeins.

Og hvað meira? Myndir segja víst meira en þúsund orð. Og svona var árið í myndum:

Það byrjaði ekki í Borgarnesi eins og venjulega, heldur heima, í Hafnarfirði, vegna Covid-samkomutakmarkana.

Flugeldar og svifriksmengun — Flugeldar yfir Setbergshverfinu í Hafnarfirði. Þetta er ekki þoka, heldur svifryksmengun. Langt yfir heilsuverndarmörkum. Hvenær ætlum við eiginlega að banna flugelda?

Mætti í skírnarveislu hjá þessari stúlku.

Sigríður Steinunn á skírnardaginn — Litla Sigríður Steinunn Hjaltadóttir á skírnardaginn.

Mættti aftur til vinnu eftir að hafa verið að vinna heima í næstum því fjóra mánuði.

Fyrir utan Aðalbyggingu Háskóla Íslands — Gul viðvörun fyrir utan Aðalbyggingu Háskóla Íslands.

Kafarabúningur — Gul viðvörun fyrir utan Aðalbyggingu Háskóla Íslands.

Nýtti tækifæri á milli samkomutakmarkana til að fara í leikhús.

Í áhorfendasal Þjóðleikhússins. Daginn eftir var sett á enn ein 20 manna samkomutakmörkun.

Fór Upp í Borgarnes um páskana

Fór að skoða eldgosið

Atli með eldgosið í baksýn — Bergnuminn yfir eldgosinu

Gekk nokkrum sinnum upp á Helgafell. Mun þó ekki hafa komið þangað upp nema 48 sinnum á árinu, sem er óvenju lítið miðað við undanfarin ár!

Atli uppi á Helgafelli — Uppi á Helgafelli

Fór aftur að skoða gosið, skegglaus í þetta sinn!

Tók þátt í hátíðarhöldum 17. júní í Hafnarfirði

Skrúðganga 17. júní 2021 — Með lúðrasveitinni fyrir skrúðgönguna 17. júní.

Fór í bað í Borgarfirði

Fór í hringferð um Ísland, með áherslu á Austurland:

Skoðaði nýja miðbæinn á Selfossi.

Hluti af nýja miðbænum á Selfossi — Húsið með næputurninum fremst á myndinni er endurbygging á húsi sem var á Vesturgötu í Hafnarfirði, við hliðina á A. Hansen. Það var rifið í áföngum til að greiða fyrir bílaumferð!

Stoppaði á Vík.

Nestisstund í Vík — Anna, Ósk og afi í nestisstoppi í Vík.

Sá Reynisdranga – samt naumlega fyrir þoku.

Skoðaði Þórbergssetrið.

Gekk langleiðina að Fláajökli.

Heimsótti Höfn í Hornafirði. Horfði m.a. á hluta af fótboltaleik. Reyndi fyrir mér sem íþróttaljósmyndari í fyrsta sinn.

Fótboltaleikur á Höfn í Hornafirði — Sindri og Augnablik keppa í 3. deild karla í fótbolta.

Staldraði við á Djúpavogi

Skoðaði eggin í Gleðivík, á Djúpavogi.

Heimsótti Mjóafjörð.

Í Brekkuþorpi í Mjóafirði heita allir Vilhjálmur eða Hjálmar, eða eru Vilhjálmssynir/Vilhjálmsdætur eða Hjálmarssynir/Hjálmarsdætur.

Meira að segja hundarnir. Þessi hundur heitir Villi.

Heimsótti Seyðisfjörð

Seyðisfjörður — Norðurgata á Seyðisfirði skreytt í regnbogalitum.

Skoðaði Álfaborg á Borgarfirði eystri

Skoðaði lunda á Borgarfirði

Stoppaði í Atlavík.

Atli í Atlavík. Hér spilaði Ringo líka 37 árum fyrr, næstum því upp á dag þegar þessi mynd var tekin.

Skoðaði Skriðuklaustur

Leit yfir Stuðlagil.

Gisti á Syðra-Lóni.

Fór út á Font, í blíðskaparveðri.

Á Fonti á Langanesi — Úti á Fonti á Langanesi. Lengra verður ekki komist á Íslandi.

Naut sólarinnar…

Atli í sólbaði — Í sólbaði á Syðra-Lóni. Það er alltaf sól á Norðurlandi!

…og sólarlagsins, úti við heimskautsins baug.

Sólarlag á Syðra-Lóni — Þistilfjörður og Syðra-Lón. Eruð þið ekki að grínast með hvað þetta er fallegt útsýni!

Gisti á gistiheimilinu Himnasvölum í Skagafirði. Var einn af síðustu gestunum þar, því gestgjafinn lést bara rúmri viku síðar.

Skoðaði gosið í fjarlægð á þaksvölunum – frá miðbæ Hafnarfjarðar.

Gosmökkurinn séður frá miðbæ Hafnarfjarðar.

Náði nokkrum októberfestgiggum á meðan veiran tók sér frí.

Þetta var ferðamáti ársins:

Rafmagnshlaupahjól, rafskútur, rafskottur, eða hvað sem þið kjósið að kalla þau.

Sá Bubba í Borgarleikhúsinu.

Bubbi Morthens - 9 líf — Bubbi Morthens – 9 líf

Mætti á kjörstað.

Bílafrekjan: Bílum lagt upp á gangstétt.

Við eigum nýja stjórnarskrá!

Söng á tónleikum með þessu fólki:

Og spilaði á tónleikum með þessu fólki:

Lúðrasveit Hafnarfjarðar fyrir tónleika í Norðurljósum, Hörpu.

Sá þennan krumma:

Krummi á handriði göngubrúar yfir Hringbraut í Reykjavík.

Undirbjó jólin, svona eins og ég nennti.

Sá Baggalút í Háskólabíói.

Baggalútur í Háskólabíói — Ég á það skilið: Baggalútur, Bríet og Kristján Jóhannsson á tónleikum í Háskólabíói.

Hélt upp á jól og hækkandi sólargang síðustu helgi ársins.

Já, og allur bjórinn sem ég drakk! Við yfirferð á Flickr kemur í ljós að stór hluti af myndum sem ég tók á þessu ári eru allskonar bjórmyndir. Það lætur mig líta illa út að birta þær allar. En hér er bara ein, af handahófi:

Og um það bil þannig lýkur þessu ári.

Ég vona að við eigum fleiri samverustundir á næsta ári. Og þá meina ég samverustundir í þrívídd. Þó að einhverfuhlutinn af mér og introvertinn ég séum að vissu leyti ánægð með samkomutakmarkanir vil ég líka fara út að hitta fólk, djamma og djúsa, spila rassinn úr buxunum og koma ekki heim fyrr en klukkan 5-6 um morguninn. Ég vona að svo geti orðið sem fyrst á nýju ári.

Hafið það gott um áramótin og takk fyrir gamla árið.

Myndaannállinn 2020

31. desember, 2020 Atli

Kæra 2020.

Takk fyrir ekkert. Þú varst ömurlegt ár.

Verkföll. Jarðskjálftar. Aurskriður. Snjóflóð. Næstum því eldgos. Deyfð og dapurleiki yfir þjóðfélaginu. Veira. Covid. Kreppa. Gjaldþrot. Atvinnuleysi. Drepsóttir. Kynþáttafordómar. Öfgaþjóðernishyggja. Nasismi að rísa upp aftur. Fengum ekki að hittast nema á fjarfundum. Urðum að vera ein heima og máttum ekki gera neitt skemmtilegt. Öllu frestað eða aflýst nema sumum íþróttum.

Ég vona að arftaki þinn verði betri. Það þarf nú ekki mikið til að toppa þig.

En jæja, ókei þá. Sumt af því sem þú bauðst upp á, kæra 2020, var gott. Appelsínuguli maðurinn í hvíta húsinu kosinn í burtu. Rafrænum samskiptaleiðum fleytir fram. Íslenskar verslanir virðast vera að læra að það er líka hægt að versla á netinu. Og það er byrjað að bólusetja fók fyrir Veirunni. Það er nú eitthvað.

Þú hefur líka alveg stundum verið gott við mig, þrátt fyrir allt. Ég fékk (líklega) ekki Covid. Þurfti ekki að vera í sóttkví – nema sjálfskipaðri. Hef ekki misst neinn nákominn úr Veirunni. Og hef haft nóg að gera allt árið.

Introvertinn ég var m.a.s. að mörgu leyti ánægður með „ástandið í þjóðfélaginu“. Hraðinn minnkaði í samfélaginu á tímabili. Því það þurfti ekki að mæta neitt. Þurfti ekki að skálda upp afsakanir fyrir því að nenna ekki að mæta á samkomur eða viðburði. Því stundum er gott að vera bara einn heima að glápa á Netflix.

En mig langar samt alveg líka að fara út og hitta fólk annars staðar en bara á Teams- eða Zoom. Ég vil mæta til vinnu og fá mér kaffi með vinnufélögum. Ég vil fara á barinn og vera þar til kl. 3. Ég vil fara í partý eins og allir ráðherrar mega, fara síðastur heim úr partýinu og fara ekki að sofa fyrr en klukkan 6 að morgni! Því ég hef verið of mikið aleinn heima allt árið. Hef ekki haft neinn félagsskap og er búinn að gleyma hvernig á að hafa mannleg samskipti í þrívíddarheiminum. Og mig langar til útlanda, því við erum of einangruð á þessu landi!

Þó að stafræn samskipti og fjarfundir séu oft góð er þreytandi að hitta fólk bara í rafrænu formi. Tæknin kemur aldrei í staðinn fyrir mannlegu nándina.

Ég gerði samt mitt besta, kæra 2020, til að gera þig bærilegt. En það er bara nóg komið af þér. Og ég vil bara láta þig vita að þér er hér með sagt upp störfum frá og með miðnætti í kvöld!

En svona varstu fyrir mér:

Þú byrjaðir í Borgarnesi, eins og síðustu 20-30 forverar þínir.

Hélt áfram störfum í Háskólanum. Hafði m.a.s. of mikið að gera þar, í 150-160% starfi framan af árinu, sem er ákveðið lúxusvandamál á þessum síðustu og verstu tímum.

Útsýnið frá skrifstofuglugganum í þoku í janúar.

2007 kom aftur í janúar, þegar ég keypti sjónvarp.

Mætti á árlega ættarþorrablótið í febrúar – að þessu sinni í Borgarnesi

Náði að klæðast leðurhosunum og drekka bjór í þeim!

Og svo kom Kófið. Öllu skemmtilegu var frestað eða aflýst.

Opnaði heimaskrifstofu. Vann heima rúmlega helming ársins.

Háskóli Íslands Hafnarfirði, góðan daginn.

Bakaði súrdeigsbrauð eins og, að því er virðist, helmingur snemmmiðaldra karlmanna á Íslandi.

Og sumarið kom með betri tíð og blóm í haga. Allt varð aftur gott í smá stund. Þá klæddi ég mig í fjólublá föt og spilaði með þessu fólki:

Lúðrasveit Hafnarfjarðar við Ásvallalaug 17. júní.

Náði einu góðu kvöldi/síðdegi í miðborg Reykjavíkur.

Fór í ferðalag um Norðurland. Byrjaði á Akureyri.

Kom við á Húsavík.

Heimsótti Jaja ding dong barinn.

Líklega vinsælasti ferðamannastaður sumarsins.

Dvaldi á Syðra-Lóni í nokkra daga.

Skoðaði Ásbyrgi.

Heimsótti Vopnafjörð.

Skoðaði Siglufjörð

Gisti á Ólafsfirði

Að ógleymdum öllum Helgafellsgöngum sumarsins. Mun hafa komið 50 sinnum á toppinn á árinu. Sem er frekar í minna lagi miðað við undanfarin ár. Það verður þá markmið að koma þangað upp oftar á næsta ári.

Yðar einlægur á Helgafelli, í Hafnarfirði.

Og haustið kom. Veiran náði sér á strik aftur. Með fleiri samkomutakmarkanir. Allt lokað. Fór aftur að vinna heima og hef næstum því ekki mætt til vinnu, eða gert neitt síðan í september. Hef í mesta lagi farið út í búð og í göngutúra innanbæjar.

Og er búinn að klára Netflix.

Þegar ég skoða myndir sem ég hef tekið frá september til desember eru það mest einhverjar bjórmyndir! Ætla ekki að birta þær allar, því það lætur mig líta illa út!

En hér er sýnishorn:

Náði þó að spila nokkur jólagigg með þessu fólki:

Félagar í Lúðrasveit Hafnarfjarðar í Hellisgerði. (Mynd: Rúnar Óskarsson).

Hélt svo upp á hækkandi sólargang og endalok ársins 2020 síðustu vikuna í desember.

Og um það bil þannig endar þetta ár.

Ég vona að næsta ár verði myndríkara. Og viðburðaríkara.

Ef þið saknið einhvers úr þessu yfirliti er það líklega af því að ég á ekki myndir af því. Og það leiðir mig að einu af markmiðum næsta árs: Að ganga meira með og taka fleiri myndir með alvöru myndavél, en ekki bara símanum. Því ég hef komist að því að ég vanda mig miklu betur við að taka myndir með alvöru myndavél heldur en síma.

Þakka ykkur að lokum öllum fyrir samskipti og samveru á árinu, þrátt fyrir allt, hvort sem þau voru rafræn eða raunveruleg. Ég vona að við fáum að vera meira saman í þrívídd árið 2021 en við fengum að vera á þessu ári!

Njótið gamlárskvöldsins, hvar sem þið eruð. Munið að þið þurfið ekki að kaupa flugelda ef þið viljið styrkja björgunarsveitirnar. Þið getið líka gefið þeim pening án þess að þurfa að fá nokkuð í staðinn, nema gleðina og ánægjuna. Gangið bara hægt um gleðinnar hurð.

Og vonandi verður 2021 miklu skemmtilegra. Ég held að það sé engin hætta á öðru! Við erum öll (nema sum) í þessari baráttu saman!

Myndaannállinn 2019

31. desember, 2019 Atli

Það er þess virði að halda úti þessum vef þó ekki sé nema bara vegna hins árlega myndaannáls.

Ég man ekkert hvað hefur verið í fréttum á árinu. Það er því ekki tilefni til að vera með vangaveltur um þjóðfélags- eða dægurmálaumræðu. Enda er þetta ekki vettvangur fíflagangs. Þið getið fengið nóg af svoleiðis á fréttamiðlum og í umræðum meðal virkra í athugasemdum.

Fyrir mig hefur þetta verið ágætis ár. Ferðalög innanlands og utan komu við sögu. Þetta var ár breytinga. Þetta var ár nýrra verkefna. Þetta var ár tækifæra. Þetta var ár áskorana. Þetta var ár flutninga. En byrjum á byrjuninni.

Árið hófst í Borgarnesi, á sama stað og því síðasta lauk, eins og árin á undan.

Flugeldar um áramót — Flugeldar og svifryksmengun yfir Borgarnesi.

Hélt áfram að vinna í Háskólanum. Varð fastráðinn þar í mars/apríl.

Loftið og gluggarnir í Aðalbyggingu Háskóla Íslands — Listræn mynd af Aðalbyggingu Háskóla Íslands

Fór niður í Raufarhólshelli.

Raufarhólshellir — Niðri í dimmum Raufarhólshelli.

Mætti á ættarþorrablót, samkvæmt venju.

Ættarþorrablótið 2019 — Stuð á þorrablóti Syðra-Lónsættar

Fór á UT-messuna í Hörpu. Sá risaeðlu.

Risaeðla á göngum Hörpu — Risaeðla mynduð í bak og fyrir

Og skoðaði tunglið.

Spilaði með Lúðrasveit Hafnarfjarðar, Pollapönki og Kór Öldutúnsskóla á tónleikum.

Kór Öldutúnsskóla, Lúðrasveit Hafnarfjarðar og Pollapönk hita upp. — Kór Öldutúnsskóla, Lúðrasveit Hafnarfjarðar og Pollapönk

Gekk reglulega upp á Helgafell. Mun hafa komið á toppinn sjötíuogtvisvar sinnum á árinu.

Sá Jesus Christ Superstar í Hörpu um páskana.

Fór í Costco í fyrsta sinn.

Eignaðist svona tímabundinn nágranna á vordögum.

Þröstur og ungar í hreiðri — Þröstur minn góður…

Fór út í Viðey.

Fór með þessu fólki til Münchenar og Ítalíu.

Lúðrasveit Hafnarfjarðar í Desenzano á Ítalíu. — Lúðrasveit Hafnarfjarðar

Drakk bjór í Augustiner-bjórgarðinum.

Kom við í Innsbruck

Sigldi á Garda-vatninu.

Sigling á Garda-vatninu. — Á Garda-vatninu.

Fór til Feneyja.

Í þröngu húsasundi í Feneyjum. — Í einu af þröngum húsasundum í Feneyjum.

Kom við í Mílanó.

Atli. Dómkirkjan í Mílanó í bakgrunni. — Fyrir utan dómkirkjuna í Mílanó

Fór í innanlandsflug í fyrsta skipti í þrjátíu ár. Fékk samt ekkert flugviskubit. Síðast var það til Ísafjarðar. Í þetta sinn var það líka til Ísafjarðar.

Heimsótti Gamla bakaríið.

Ford fyrir utan Gamla bakaríið á Ísafirði — Ford fyrir utan Gamla bakaríið

Fór á tvær bæjarhátíðir á Vestfjörðum.

Dýrafjarðardagar á Þingeyri. Jói Pé og Króli trylla lýðinn.

Fór upp á Bolafjall. Tvisvar sinnum. Í annað skiptið í þoku, í hinu í sólskini og fögru útsýni.

Ratsjárstöðin á Bolafjalli. — Ratsjárstöðin á Bolafjalli

Ísafjarðardjúp, séð frá Bolafjalli. — Stórkostlegt útsýni yfir Djúpið frá Bolafjalli.

Fór í bíó á Ísafirði.

Borðaði á Tjöruhúsinu.

Frá Ísafirði lá leiðin norður. Stoppaði í Brynjuís á Akureyri

Ísbúðin Brynja á Akureyri — Brynjuís. Nauðsynlegur áfangastaður fyrir túrista á Akureyri.

Stoppaði á Húsavík.

Kom við í Ásbyrgi.

Gisti á Syðra-Lóni.

Tíndi dún í æðarvarpinu á Syðra-Lóni.

Fór út á Font á Langanesi.

Fontur á Langanesi. — Fontur. Lengra verður ekki komist á Íslandi.

Fór út að Skálum.

Húsarústir að Skálum á Langanesi. — Skálar. Eitt sinn blómlegt fiskiþorp. Nú húsarústir sem bíða þess að verða veðri og vindum að bráð.

Skoðaði hesta á Syðra-Lóni

Skoðaði gamla bæinn að Bustarfelli

Kynnti mér skemmtanalífið á Þórshöfn.

Fór upp í Reykholt.

Reykholtskirkja í Borgarfirði — Reykholtskirkja

Fór í bað í Kraumu.

Krauma spa í Borgarfirði — Krauma í Borgarfirði.

Heimsótti álverið í Straumsvík. Og spilaði þar líka.

Fór í jazzgöngu í Reykjavík

Skrúðganga í Reykjavík. Café París í bakgrunni. — Jazzganga í tilefni Jazzhátíðar í Reykjavík.

Gerðist stundakennari við Háskóla Íslands og kenndi u.þ.b. hálft námskeið. Eitthvað sem ég sá aldrei fyrir mér að gera í upphafi ársins.

Fór í vinnuferð á Laugarvatn.

Ákvað að gerast þræll banka og lífeyrissjóða um ókomin ár og keypti íbúð. Í miðbæ Hafnarfjarðar.

Strandgata 31-33, Hafnarfirði — 101 Hafnarfjörður. Strandgata 31-33.

Spilaði á nokkrum októberfestum.

Heimsótti Jólaþorpið í Hafnarfirði

Jólaþorpið í Hafnarfirði að kvöldi. — Jólaþorpið

Hélt upp á jól og hækkandi sólargang undir lok ársins.

Og þannig var nú það. Fleira markvert hefur svo sem gerst á árinu. En myndavélin hefur oft gleymst, ýmist heima eða í vasanum, og þess vegna eru sumir atburðir ekki skráðir hér.

Munið að lokum að þið þurfið ekki að kaupa flugelda til að styðja björgunarsveitirnar. Til dæmis má kaupa Rótarskot eða gerast Bakvörður. En gangið hægt um gleðinnar dyr á gamlárskvöld.

Takk fyrir samskipti og samveru á árinu 2019. Með von um að árið 2020 verði ennþá betra og skemmtilegra.

Myndaannállinn 2018

31. desember, 2018 Atli

Ég man næstum því ekki eftir neinu sem hefur verið í fréttum á þessu ári.

Eins hjá flestum Íslendingum nær fréttaminni mitt ekki lengra en tvo mánuði aftur í tímann. Þannig að lykilatriði ársins eru:

Sigmundur Davíð og aðdáendur fóru á afdrifaríkt fylleríi. Aðdáendaklúbbur hans gerir sér ekki grein fyrir því að þeirra er ekki óskað lengur. Stjórnvöld í Reykjavík byggðu allt of dýran bragga. Dýr afmælisveisla á Þingvöllum. Þingmenn senda þjóðinni reikning vegna bílferða. Flugfélög fóru á hausinn. Hópuppsagnir. Stéttaskipting. Túristabransinn að hrynja. Ný kreppa í uppsiglingu, allt íslensku krónunni að þakka. Ísland – bezt í heimi!

Leiðinlegir, gamlir, frekir, hræddir sjötugir og eldri karlar (á öllum aldri, af öllum kynjum) sem óttast breytingar og vilja hafa landið sem mest einangrað frá umheiminum ráða of miklu á landinu. Svona viljum við hafa það. Ekkert vesen og allt í góðu lagi. Þetta var tvöþúsundogátján.

En ég ætla ekki út í frekari pólitíska umræðu. Læt misvitrum Moggabloggurum og virkum í athugasemdum það eftir.

Fyrir mig hefur þetta verið ágætt ár. Heilsan hefur verið í góðu lagi, sem maður má þakka fyrir, kominn á þennan aldur. Það hefur verið nóg að gera hjá mér. Ég skoðaði heiminn og kom á marga staði sem ég hafði aldrei komið til áður. Ég nýtti mér minn skerf af góðærinu, svona rétt áður en það leið undir lok.

Til að skoða árið betur er kominn tími til líta á nokkrar myndir. Það er þess virði að halda þessum vef úti bara fyrir þennan árlega myndaannál. Svona var árið 2018 í myndum:

Það hófst í Borgarnesi, eins og síðustu 20-30 ár á undan.

Skoðaði gervitungl á Háskólatorgi. Fékk líka að halda á því. Þetta er líklega dýrasti hlutur sem ég hef handleikið.

Gervitungl á Háskólatorgi. Rósalind skoðar það líka.

Spilaði Trivial.

Sá vélmenni á UT-messunni í Hörpu.

Mætti á ættarþorrablót ásamt þessum (og fleira fólki sem er ekki á myndinni).

Þjóðbúningar — Á þorrablóti Syðra-Lónsættar 3. febrúar.

Hélt upp á öskudaginn.

Gekk upp á Helgafell. Mun hafa komið á toppinn sextíuogþrisvar sinnum á árinu, frá 24. mars til 26. desember.

Spilaði á tónleikum með þessu fólki.

Lúðrasveit Hafnarfjarðar fyrir utan Víðistaðakirkju — Lúðrasveit Hafnarfjarðar eftir tónleika í Víðistaðakirkju 21. apríl.

Söng á tónleikum í Skálholtskirkju.

Fór með þessu fólki til Barcelona…

Kammerkór Hafnarfjarðar í Santa Maria del Pi — Undirritaður og Kammerkór Hafnarfjarðar eftir tónleika í Santa Maria del Pi, í Barcelona.

… Söng þarna…

…skoðaði Montserrat…

…heilsaði upp á Svörtu Maríu…

…og naut útsýnis yfir Barcelóna.

Sjálfa í Barcelona. — Undirritaður með hluta af Barcelona í baksýn.

Frá Barcelona lá leiðin til Parísar. Skoðaði Eiffelturninn…

Hjá Eiffelturninum — Á Champ de Mars með Eiffelturninn í baksýn.

…sá Mónu Lísu á Louvre-safninu…

…skoðaði Notre Dame-kirkjuna…

…fór upp í Sigurbogann…

…og naut útsýnis yfir París.

Sjálfa í París — Uppi í Sigurboganum, með París í baksýn.

Fór frá París til London:

Turnbrúin í London — Að benda á Turnbrúna í London.

Keypti fjólubláan plasttrompet…

…sá Bat out of hell…

…Harry Potter og bölvun barnsins…

…og Vesalingana.

Vesalingarnir í Queen's Theatre í London. — Vesalingarnir í Queen’s Theatre í London.

Skoðaði sirkustjaldið í Reykjavík. Þó bara að utan – ekki að innan.

Heimsótti geitur á Háafelli.

Fór í spa í Borgarfirði.

Sá Hringadróttinssögu í Hörpu.

Hringadróttinssaga - Tveggja turna tal. — Hringadróttinssaga – Tveggja turna tal.

Hélt upp á stóra 4-0 afmælið í München.

Heimsótti Augustiner-bjórgarðinn:

Augustiner-garðurinn. — Systkinin sæl og glöð í Gústa.

Skoðaði dýragarðinn í München…

…fór upp í Ólympíuturninn…

Uppi í Ólympíuturninum í München. — Uppi í Ólympíuturninum með Ólympíuþorpið og nágrenni í baksýn.

…heimsótti Bavaria Filmstadt…

…og kannaði slóðir Lúðvíks II. konungs af Bæjaralandi.

Neuschwanstein-kastali. — Neuschwanstein, kastalinn hans Lúlla kóngs.

Spilaði á nokkrum októberfestum á stór-Hafnarfjarðarsvæðinu.

Djammaði með vinnufélögum.

Skoðaði hafpylsuna á Reykjavíkurtjörn.

Hafpylsan á Reykjavíkurtjörn og Ráðhúsið.

Fór á WebSummit, risastóra vefráðstefnu í Lissabon…

Websummit 2018 — Tim Berners Lee, höfundur internetsins eins og við þekkjum það, heldur ræðu.

…með þessu fólki.

Í Lissabon — Hlín, Bryndís og Sigfús í Lissabon.

Keypti nýja tölvu. Það er þá staðfest: Næsta hrun verður mér að kenna. Þess vegna gef ég leyfi fyrir því að láta tjarga mig og fiðra þegar þar að kemur.

Fór á jólatónleika Baggalúts í Háskólabíói.

Baggalútur á jólatónleikum í Háskólabíói.

Söng í Hörpu.

Harpa. — Harpa í íslensku fánalitunum á 100 ára afmæli fullveldisins.

Skoðaði jólaköttinn í miðbæ Reykjavíkur.

Jólakötturinn — Þið kannist við jólaköttinn.

Mótmælti á Austurvelli.

Mótmæli á Austurvelli — Þetta alþingi er áfall.

Skoðaði alþingishúsið.