Atli Týr Ægisson

Það er óþarfi að henda banönum þó að þeir séu orðnir gamlir og hýðið á þeim orðið svart. Það er hægt að baka úr þeim, til dæmis þetta bananabrauð:

Innihald:
1 egg
150 g sykur
2 þroskaðir bananar
250 g hveiti
1/2 tsk matarsódi
1 tsk salt

Aðferð:
1. Þeytið eggið og bætið sykrinum saman við í skömmtum. Þeytið eggið og sykurinn vel saman í hrærivél.
2. Merjið bananana með gaffli og hrærið saman við eggið og sykurinn.
3. Sigtið saman hveiti, matarsóda og salt og hrærið saman við bananablönduna.
4. Setjið í vel smurt aflangt form, (1 1/2 lítra), og bakið við 180°C en 160° með blæstri í 45 mínútur.

Þjóðverjar kunna að búa til góðar kjötbollur, öfugt við Íslendinga, sem búa þær til úr kjötfarsi eða einhverju sem inniheldur ekki kjöt. Hér eru bæverskar kjötbollur:

INNIHALD:
500 gr hakk (má vera blandað, t.d. nauta- og svínahakk).
1-2 harðar brauðsneiðar
smá mjólkurdreitill
1 stór laukur
1 tsk tómatpúrra
2 tsk meðalsterkt sinnep
1 egg
pipar
salt
1 hvítlauksgeiri
Marjoram (kryddmæra)
smjörklípa eða olía til steikingar

AÐFERÐ:
1. Bleytið upp í harða brauðinu með mjólkinni þangað til það er orðið lint.
2. Skerið laukinn í bita
3. Setjið hakkið í skál ásamt bleyttu brauði, lauk, hvítlauk, tómatpúrru, sinnepi og eggi. Bætið kryddinu við út í eftir smekk. Hrærið svo allt vel saman.
4. Hnoðið kúlur úr hakkblöndunni og steikið á pönnu í um 15 mínútur, eða þar til bollurnar eru orðnar gegnsteiktar.

Úr þessari uppskrift verða u.þ.b. tíu bollur.

Það má líka leika sér með tilbrigði af uppskriftinni.
Til dæmis má bæta steinselju við út í hakkblönduna eða auka skammtinn af hvítlauknum og sinnepinu, allt eftir smekk.

Súrkál er eitt af aðalsmerkjum þýska eldhússins. Það hentar vel með góðum pylsum (og þá ekki íslenskum SS pylsum). Mæli með Pylsumeistaranum við Laugalæk.

Innihald:
1 kg súrkál (til dæmis Krautboy í 500 g pokum, fæst m.a. í Fjarðarkaupum)
1 stór laukur
1 grænt epli
100 g beikon
150-200 ml eplasafi (eða sætt hvítvín á tyllidögum)
15-20 einiber
1-2 msk kúmen
smjörklípa til steikingar.

Aðferð:
1. Beikon skorið í bita og brúnað í potti í nokkrar mínútur. Síðan er það veitt upp úr pottinum og geymt.
2. Laukurinn skorinn í bita og látinn krauma í beikonfeitinni í nokkrar mínútur. Gætið þess að allar skófir leysist upp.
3. Súrkálinu og einiberjunum bætt við laukinn, öllu blandað vel saman og látið krauma í u.þ.b. 20 mínútur. Ef lítill vökvi er í pottinum má hella hluta af eplasafanum saman við.
4. Eplið er kjarnhreinsað, skorið í bita og þeim bætt við út í pottinn ásamt kúmeni. Látið malla í aðrar 20 mínútur.
5. Beikoninu bætt út í og hrært saman við allt.
6. Svo er þetta smakkað til og eplasafa, kúmeni, einiberjum, salti eða pipar bætt við eftir smekk. Einnig má bæta svínasoðsteningi út í ef þess þarf.
7. Að lokum er þetta látið malla í u.þ.b. 10 mínútur í viðbót áður en það er borið fram.

Súrkálið er ekki síðra upphitað og því er hentugt að útbúa það kvöldið áður en á að borða það eða fyrr um daginn. Við upphitun gæti þurft að bæta meiri vökva út í það. (Eplasafa, hvítvíni eða vatni).

Kökur dagsins eru ættaðar frá Noregi. Þær koma við sögu í einu af höfuðverkum norskra leikbókmennta: Dýrunum í Hálsaskógi. Þetta eru piparkökur Hérastubbs bakara, bakaðar eftir Piparkökusöngnum:

Þegar piparkökur bakast kökugerðarmaður tekur
fyrst af öllu steikarpottinn og eitt kíló margarín,
bræðir yfir eldi smjörið en það næsta sem hann gjörir
er að hræra kíló sykurs saman við það, heillin mín.

Þegar öllu þessu er lokið hellast átta eggjarauður
saman við og kíló hveitis hrærist og í potti vel.
Síðan á að setja í þetta eina litla teskeið pipar,
svo er þá að hnoða deigið, breiða það svo út á fjöl.

Þetta er dálítið stór uppskrift, enda notuð af faglærðum bakara í bakaríi. Hér er búið að minnka hana niður í 1/8 af því sem segir í söngnum og þá lítur hún svona út:

125 g smjör
125 g sykur
1 eggjarauða
125 g hveiti
1/8 tsk pipar

1. Smjörið brætt í potti ef það er ekki lint.
2. Smjör og sykur hrærð saman.
3. Eggjarauðunni bætt út í.
4. Hveitið sett saman við og allt hrært vel.
5. Pipar bætt við.
6. Deigið sett á bökunarplötu með teskeið. U.þ.b. ein teskeið fyrir hverja köku. (Það er ekki hægt að fletja það út, eins og gert var í leikritinu og ekki heldur hægt að móta karla og kerlingar úr deiginu).
7. Bakað við 180° í 10-12 mínútur.

Uppskriftin af þessum kökum gekk manna á milli í árdaga internetsins, í kringum 1996. Með uppskriftinni fylgdi saga af viðskiptavini sem var rukkaður um 250 dollara fyrir kökuuppskrift frá Neiman Marcus og hefndi sín með því að dreifa uppskriftinni með tölvupósti. Þess vegna eru þessar kökur kallaðar Neiman Marcus kökur eða Netkökur.

Sagan á bak við kökurnar er reyndar ekki sönn og hún hefur verið til í ýmsum útgáfum miklu lengur en þetta svokallaða internet. En kökurnar eru góðar. Hér er þýdd og staðfærð útgáfa af uppskriftinni:

200 g smjör
2 egg
2 dl púðursykur
1 dl sykur
1 tsk vanilludropar
1 tsk matarsódi
1/2 tsk salt
1 tsk lyftiduft
6 dl haframjöl
5 dl hveiti
60-100 g saxaðar hnetur
200-300 g súkkulaðibitar (Hershey’s chocolate chips eða venjulegir Hershey’s dropar sem eru saxaðir niður í bita – eða bara íslenskt suðusúkkulaði, því íslenzkt er bezt, eins og við vitum).

1. Hitaðu ofninn í 180°C
2. Hrærðu linu smjöri, eggjum, púðursykri og sykri saman í hrærivél.
3. Bættu þurrefnunum og vanilludropunum við og hrærðu í stuttan tíma.
4. Settu hnetur og súkkulaði út í skálina og hrærðu saman við (með sleif).
5. Búðu til kúlur úr deiginu og bakaðu þær í u.þ.b. 10-12 mínútur.

Þetta verða u.þ.b. 90 kökur.
Það má minnka uppskriftina um helming.