Á vorin koma skólakrakkar heim með allt föndrið úr skólanum sem þeir hafa gert yfir veturinn. Þannig er það líka í Háskóla Íslands.
Hér er megnið af því sem ég hef gert í vetur, ýmist einn eða með öðrum – og allt sem verður birt opinberlega:
Hlaðvarp: Allt um októberfest
Októberfest er meira en bara bjór, þó að hann sé vissulega mikilvægur hluti af hátíðinni. Ef vel á að takast til þarf líka að hafa viðeigandi tónlist, viðeigandi föt og viðeigandi mat. Hér er fjallað um það helsta sem þarf að vera til staðar til að skapa rétta andann fyrir októberfestið.
Lífssagan: Ég lít á þetta sem geðrækt – Gréta og gærurnar
Gréta Pálsdóttir (mamma) hefur frá unga aldri verið áhugamanneskja um ull og ullarvinnslu. Hún hefur unnið með ullina á öllum stigum, allt frá því hún kemur af skepnunni þar til hún verður að fullkláraðri afurð. Hér spjallar hún um þetta áhugamál sitt og sýnir okkur ullina á nokkrum ólíkum framleiðslustigum.
Hugvekja: Gargandi snilld
Unnið ásamt þeim sem nefnd eru í kreditlistanum í lok þáttarins.
Kynningarmyndband fyrir Bókhlöðuna
Unnið ásamt Áslaugu Tóku Gunnlaugsdóttur, í samvinnu við Bókhlöðuna.
Hvað er máltækni og hvaða máli skiptir hún fyrir íslensku?
Unnið ásamt Viðari Snæ Garðarssyni, í samvinnu við Vísindavefinn og Eirík Rögnvaldsson.
Hvort sem við erum að halda upp á afmæli Jesúsar, lengri sólargang eða eitthvað annað skulum við njóta jólanna. Því það er líka alveg hægt að halda upp á jólin þó að maður sé trúlaus. Á næsta ári verðum við ekki svo heppin með jólin. Því þá lenda helstu hátíðardagarnir á helgi og það verður bara einn aukafrídagur.
Þetta eru búin að vera ágætis jól. Eftirfarandi leyndist í pökkunum í þetta sinn:
Jólagjafirnar 2015
Ullarbolur og -sokkar, sem koma sér eflaust vel í fjallgöngum komandi sumars.
Um síðustu helgi, frá fimmtudegi til þriðjudags, var ég í Edinborg ásamt stórfjölskyldunni. Hér eru tíu handahófskenndar staðreyndir sem ég komst að um Edinborg og Skotland í þessari ferð:
1. Edinborgarbúum virðist vera alvara með að ganga í jólapeysum á þessum árstíma.
2. Elsta bygging borgarinnar er í Edinborgarkastala. Það er St. Margrétarkapellan, byggð um 1130. Margrétarkapellan (St. Margarets Chapel), elsta bygging í Edinborgarkastala
3. Á salernunum á barnum Whistlebinkies er hægt að kaupa kynlífsleiktæki. Hjálpartæki ástarlífsins í sjálfsala.
4. Skotar eru stoltir af þjóðarréttum sínum, á borð við haggis. Þar er hægt að fá ýmis tilbrigði við haggis, allt frá djúpsteiktu á veitingastöðum yfir í innpakkað í umbúðir fyrir túrista. Eitthvað sem Íslendingar mættu taka sér til fyrirmyndar, í stað þess að bjóða endalaust upp á pizzur, hamporgara og samlokur.
5. Alvöru sekkjapípur kosta allt að 1000 pundum. Það er líka hægt að fá byrjendahljóðfæri sem kosta um 120 pund og hljóðfæri í barnastærð, sem kosta um 20 pund. Ég fékk mér eina fyrir byrjendur. Sekkjapípa fyrir byrjendur.
6. Skemmtanamenningin er öðruvísi en á Íslandi. Í Edinborg mæta menn á djammið snemma um kvöldið. Flestum vínveitingahúsum og krám er lokað á miðnætti. Aðeins klúbbar með háværri danstónlist eru opnir lengur.
7. Það var óvenjuleg hitabylgja í Edinborg fyrir þennan árstíma. Rigning og rok og fimm til tíu stiga hiti er ekki venjulegt veður í Edinborg fyrir jólin.
8. Það er til hljómsveit sem heitir Red hot chilli pipers. Meðlimir hennar eru þrír og spila allir á sekkjapípur.
9. Á jólamarkaðnum og í búðum hljómar stanslaust sama jólatónlistin. Um eina helgi fyrir jólin í Edinborg er vel hægt að fá of stóran skammt af jólalögum.
Jólin mín byrja í desember.Á síðasta áratug háði ég baráttu við snemmbúinn jólaundirbúning. Fyrir hver jól á árunum 2003-2008 setti ég upp vefsíðu með lista yfir ýmis fyrirtæki sem hófu jólaundirbúning í september, október og nóvember og hvatti fólk til að sniðganga þau í jólavertíðinni.
Ég hlaut mína fimmtán mínútna frægð fyrir þetta uppátæki. Eitt árið var fjallað um listann í Íslandi í dag á Stöð tvö. Tvö ár í röð komst þetta í dagblöð, í DV árið 2005 og í Fréttablaðið 2006.
Ákveðinn fjöldi manns hefur spurt hvort ég ætli að setja svona lista aftur upp á þessu ári. Stutta svarið er: Nei, ég nenni því ekki.
Langa svarið er hins vegar:
Ég horfi lítið sem ekkert á sjónvarp.
Ég fletti dagblöðum sjaldan.
Ég er með hugbúnað í tölvunni sem felur auglýsingar á stærstu íslensku fréttavefjunum.
Auk þess er ég haldinn svokallaðri bannerblindu, sem gerir það að verkum að ég læt flestar auglýsingar á vefnum fara framhjá mér.
Þessi atriði valda því að auglýsingar sem ættu að ná til mín gera það ekki, hvort sem þær eru jólatengdar eða ekki.
Auk þess er ég námsmaður. Það er allt brjálað að gera í skólanum og því enginn tími til að sinna jólamótmælunum almennilega.
Svona snemmbúinn jólaundirbúningur og markaðs- og græðgivæðing jólanna fara samt enn í taugarnar á mér.
Vonandi getur einhver annar tekið upp þráðinn. Því það er eflaust full ástæða til þess ennþá.
Skólinn er byrjaður af krafti og fyrsti dagurinn afstaðinn.
Næstu vikur og mánuði gæti þessi síða því litast eitthvað af því sem ég verð að fást við þar.
Kemur bara í ljós. Háskóli Íslands, aðalbygging.
Fjallgöngusumrinu árið 2015 er opinberlega lokið. Rútínan er að fara aftur í gang, skólinn byrjar í næstu viku, frelsinu er lokið og því ekki tími til göngutúra, a.m.k. ekki daglega eins og í sumar. Ég útiloka þó ekki að fara í einn og einn göngutúr í haust eftir því sem tími, veður og færð leyfa.
Tímabilið hófst frekar seint þetta árið, ekki fyrr en 4. maí, því það var vetur fram í miðjan maí. Það mun því hafa staðið yfir í 119 daga. Hér koma nokkrar skemmtilegar tölfræðiupplýsingar, teknar saman með aðstoð Endomondo:
Samtals urðu gönguferðirnar 78, þar af 74 upp á Helgafell í Hafnarfirði.
Flestir dagar í röð voru 14, á tímabilinu 20. júlí til 2. ágúst.
Flestir dagar í röð án fjallgangna voru 10, frá 9.-18. maí.
Samtals eru 423,57 kílómetrar að baki eftir fjallgöngur sumarsins.
Og samtals hef ég varið 4 sólarhringum, 18 klukkutímum, 44 mínútum og 46 sekúndum á fjöllum þetta sumarið.
Kvaddi Helgafell í bili í dag, með þoku uppi á toppnum.
Einhverjum (kannski markaðs- eða auglýsingastjóra Heklu) fannst góð hugmynd að setja þetta segulskilti á landmælingastöpulinn uppi á Helgafelli í Hafnarfirði.
